Prouvençau,
veici la Coupo
Que nous vèn di Catalan ;
A de rèng beguen en troupo
Lou vin pur de noste plant.
Recant :
Coupo Santo
E versanto
Vuejo à plen bord
Vuejo abord
Lis estrambord
E l'enavans di fort !
D'un
vièi pople fièr e libre
Sian bessai la finicioun ;
E, se toumbon li Felibre
Toumbara nosto nacioun.
D'uno raço que
regreio
Sian bessai li proumié gréu ;
Sian bessai de la patrìo
Li cepoun emai li priéu.
Vuejo nous lis esperanço
E li raive dóu jouvènt,
Dóu passa la remembranço
E la fe dins l'an que vèn.
Vuejo nous la couneissènço
Dóu Verai emai dóu Bèu,
E lis àuti jouïssènço
Que se trufon dóu toumbèu.
Vuejo-nous la Pouësio
Pèr canta tout ço que viéu,
Car es elo l'ambrousìo
Que tremudo l'ome en diéu.
Pèr la glòri
dóu terraire
Vautre enfin que sias counsènt
Catalan, de liuen, o fraire,
Coumunien tóutis ensèn !
(grafio de Roumaniho) |
|
Provençaus,
veicí la Copa
Que nos vèn di Catalans ;
A de rènc beguen en tropa
Lo vin pur de nòstes plants.
Recant :
Copa Santa
E versanta
Vueja a plen bòrd
Vueja abòrd
Lis estrambòrds
E l'enavans di fòrts !
D'un
vièlh pòple fièr e libre
Siam bessai la finicion ;
E, se tombon li Felibres
Tombarà nòsta nacion.
D'una raça que regrelha
Siam bessai li promiers greus ;
Siam bessai de la patria
Li cepons emai li prieus.
Vueja nos lis esperanças
E li raives dau jovènt,
Dau passat la remembrança
E la fe dins l'an que vèn.
Vueja nos la coneissènça
Dau Verai emai dau Bèu,
E lis auti joissènças
Que se trufon dau tombèu.
Vueja nos la Poesia
Pèr cantar tot çò que vieu,
Car es ela l'ambrosia
Que tremuda l'òme en dieu.
Pèr la glòria
dau terraire
Vautres enfin que siatz consènts
Catalans, de luenh, ò fraires,
Comuniem totis ensèm !
(grafia classica) |