Lo Lugarn n° 89/90 Especial

"Federalisme"

 

Lo darrièr numéro doble de la revista Lo Lugarn, publicacion del Partit de la Nacion Occitana espepissa la question del federalisme dins una perspectiva istòrica en tornar publicar sus aquel sicut de tèxts pauc coneguts de l’abat Salvat, del Carles Camprós e de Francés Fontan, teorician de l’etnisme e del nacionalisme occitan.

 

Estudia tanben la situacion de las nacions sens estat a l’ora d’ara dins l’Estat espanhòl e al Reiaume Unit rapòrt al federalisme e a l’Union europenca. Joslinha las avançadas autonomistas sus la talvèra occitana mai que mai dins la Val d’Aran en donar la paraula a un representant del Conselh General d’Aran e las potencialitats qu’existisson dins lo Comtat de Nissa e dins dins las valadas occitanas del Piemont italian. Aquel bolegadís pausa tot naturalament la question del federalisme dins una futura Republica federala dels Paisses d’Oc que lo Partit de la Nacion Occitana jutja indispensable de bastir.

 

Coma l’escriu Joan-Pèire Alari, lo cap redactor dins l’editorial : « Nos sembla que lo bèl vam unitari e divèrs de Carcassona, lo 22 d’octòbre passat, desbocarà sus d’avançadas significativas unicament gràcias a d’accions nacionalistas decididas. Soscar al federalisme, a l’estatut de nòstra nacion, a la constitucion e al govèrn en estudiar l’experiéncia dels vesins o de païses mai luenhencs es pas del domèni de l’utopia  mas es una necessitat per ancorar nòstres pantaisses dins l’art del possible, çò que demòra la melhora definicion d’una politica nacionalista.”

 

Lo Lugarn n° 89/90, 14 € francò de pòrt jean-pierre.hilaire@wanadoo.fr