Remesa de la bandiera occitana al Cònsol d'Agen lo 18 d'octòbre de 2008
per Dòna Joanina
Cazes-Grande, presidenta
d’Agenés Tèrra Occitana
Dònas e Sénhers
Coma presidenta de l’associacion Agenés Tèrra Occitana, m’agrada particularament de me trobar aicí jos l’agach de nòstres Illustres e mai que mai de l’un d’entre eles : Jansemin
10 ans fa, la vila d’Agen organizava un collòqui per marcar lo 200en anniversari de sa naissença.
Jansemin portava naut e fòrt las colors de çò que sonava « nòstra bèla lenga gascona » e polemicava damb un autre agenés, Silvan Dumon, ministre de l’Instruccion publica, sus son avenir.
Disiá de la lenga :
« Nòstra segonda mai ! De sabents francimands
La condamnan a mòrt desempuèi tres cent ans
Tanplan viu çaquelà ; tanplan sos mòts bronzinan
Ches ela, las sasons passan, sònan, tindinan ;
E cent mila-milès enquèra i passaràn
Sonaràn e tindinaràn »
Nòstra lenga es totjorn viventa mas es amenaçada d’avaliment i aguèsse pas una mobilizacion generala de nòstres elegits locals, regionals e nacionals e de la populacion. Es necite manténer la biodiversitat mas es tanben imperatiu de manténer la diversitat lingüistica e culturala en França coma endacòm mai.
Aquela bandièra que vos remetèm uèi es pas qu’un simbòl. Aurà un sens sonca se permetèm a aquela lenga de viure e se desvolopar.
Al moment que vos parli, set caminaires partits lo 30 d’agost d’una de las valadas occitanas del Piemont italian son a perc órre los 1300 quilomètres que los desseparan de Vielha dins la Val d’Aran espanhòla de lenga occitana.
Lor tòca, otra sensibilizar las populacions de las regions atraversadas, Provènça, Lengadòc, Gasconha, a sa lenga, es de far reconeisser per l’UNESCO l’occitan coma patrimòni de l’umanitat. Maites municipis an portat lor sosten a aquela caminada que s’apèla Occitània a pè.
Esperam, Sénher Conse, que la vila d’Agen farà parièr.
Aquela modesta bandièra es pas qu’un primièr pas sus la dralha qu’esperam seguir damb lo municipi d’Agen per afortir damb ufan als uèlhs dels ageneses e de nòstres visitaires nòstra identitat occitana comuna a totes que siam ageneses de soca o que siam venguts d’endacòm mai.
Vos merceji, Dònas e Sénhers, de vòstra atencion
Comunicat d'Agenés Tèrra occitana (associacion amiga del P.N.O.)
Article de Sud-Ouest :
