Lo 17 de julhet de 1453 a Castilhon de Dordonha que dempush venguèc Castillon-la-Bataille, Aquitània qu’es perdèva l’independencia. Apuèi de tres meses de resistència, finaument en octòbre de 1453 l’armada francesa qu’entrava dens Bordèu que lo son pòble vivèva l’arribada de las tropas deu Rèi de França coma la debuta d’ua ocupacion estrangèra. 550 ans apuèi aquera que dura e perdura, on n’es la democracia en Aquitània ?

1453-2003 en abracat

En 1453 la Jurada de Bordèu qu’estó suprimida dens los prumèrs temps de l’ocupacion francesa. Lo Conselh Regionau d’uèi lo dia, de poder legislatiu n’a pas nat.

Los gascons qu’avèvan combatut dens l’armada anglò-gascona qu’èran sistematicament condemnats a mòrt. Çò qu’arribèc a las garnisons de Cadilhac e Chales es aqui tà ne testimoniar. Açò qu’explica l’exilh forçat de milierats de gascons cap a Anglatèrra, Espanha o Portugau.

En 1539 l’Edicte Reiau de Villers-Cotterêts promulgat peu François 1er qu’interdisèva l’usatge administratiu deu gascon e de totas las variantas regionaus de l’occitan.

En 1652-1653 la vila de Bordèu e lo son parçan qu’eston lo teatre d’una vertadèra tentativa ende recobrar l’independencia perduda dus sègles ençà : Qu’estó la Republica Gascona de l’Ormèa. La repression d’aqueste movement que serà de las sangnosas.

Dab la Revolucion Francesa, los deputats aperats Girondins que creguen i arretrobar las idèas de democracia e de libertat deus lors aujòus.
Qu’eston sacrificats sus l’autar de la centralisacion jacobina francesa au servici de Paris e deus sons Prefectes. Auèi enqüera que son eles qu’an lo poder vertadèr dens los nòstes departaments e las nòstas regions occitans.

En 1881 las leis Jules Ferry tocant l’ensenhament publíc, laic, a gratis e obligatòri qu’eston adoptadas peu Parlament de la 3au Republica.
Quitament se lo lor aspècte umanista ne’s pòt pas negar, aqueras leis escolaras qu’impausèn la sola lenga francesa en tot mespresar tant la nòsta lenga e la nòstra cultura occitanas, coma las de totes los pòbles vencits de l’estat Francés.

Los pòbles vencits e los que s’i resignen n’escriven pas l’istòria, la règla qu’es la medisha tau’s gascons. La nòsta istòria qu’es estada escrita de «com cau» e falsificada per Paris, tà Paris e l’Estat Francés per d’istorians que pensavan de plan dins lo « sens de l’istòria » francesa.
La resulta que l’am : Auèi la part mei grana deus aquitans que creden qu’èm estats colonisats peus angleses, que desconeishen cap e tot la quita existencia istorica de la Republica de l’Ormèa, e parlen sonque la lenga deus vencedors. Tant coma las autas regions occitanas, Aquitània qu’ei venguda ua reserva de foncionaris de bon exportar, d’artistas e d’esportius au servici de la glòria de Paris e d’ua França divinisada.

Se pensatz qu’Aquitània s’amerita mièlhs que l’aviener traçat per Paris e acceptat per un personau politica regionau aus sons òrdres que’vs invitam en de participar nombroses au recampament passa-carrèra entà comemorar deu nòste biais la debuta de Pocupacion francesa a Bordèu.

Per la Dignitat deu País Mantenguer : Rendètz vos a Bordèu lo dissabte 18 d’octòbre de 2003 au pè deu Fòrt deu HA, carrèra deus Frères Bonie (entre la Plaça Pèir Berland e lo Cors d’Albret, a costat deu Palatz de Justicia), partènt de 14 òras 30.

ENTÀ D’UA VERTADÈRA REGIONALISACION CULTURAU, LINGUISTICA E POLITICA

Venètz dab la vòsta bona umor, las vòstas eisinas de musica de tota mena (Bohas o cassòlas dab culhèrs etc), los vòstes drapèus aquitans e/o occitans.

Que podètz juntar telefonicament Lo Collectiu Per la Dignitat deu País Mantenguer au : 05 56 81 41 84 e au 05 56 86 03 71.

Prumèrs signataris : UNITAT D’ÒC e lo PARTIT NACIONALISTA OCCITAN