Comunicat de Premsa

13/ 10/ 2005

Perqué sèm a Carcassona uèi lo 22 d’octòbre de 2005 ?

De Montluçon a Carcassona, de Bordèu a Nissa, de Vièlha a Fenèstrela, la lenga occitana, parlada uèi o recentament, es l’indici sintetic de la nacion occitana.

Dempuèi de sègles  e subretot dempuèi l’escòla del Jules Ferry, l’Estat francés a ensajat de la desrasigar e de descervelar los occitans, coma los bretons, los bascs, los flamencs, los alsacians, los còrses e los catalans per los i far creire que son franceses.

A pas encara completament capitat dins aquela entrepresa de genocidi cultural.

Emai França foguèsse sòci de l’Union europenca qu’es per la diversitat lingüistica, a pas ratificat la Carta europenca de las lengas minoritarias nimai modificat l’article 2 de sa constitucion que impausa lo monolingüisme francés dins la Republica.

Es pas estonant que la plaça de l’occitan/ lenga d’òc siá magrinèla dins  los mèdias, la creacion, l’ensenhament e la vida publica.

Lo Partit de la Nacion Occitana manifesta logicament per l’occitan a Carcassona aqueste 22 d’octòbre de 2005 perque volèm que nòstra lenga, nòstra cultura, nòstre biais de viure s’avaliscan pas.

I a mai d’un biais d’aparar e de promòure çò que fa de nosautres que sèm escartairats,entre tres estats, un pòble diferent del pòble francés, castelhan o italian.

Òm pòt viure Occitània dins l’esport, la cosina , la musica tradicionala o mai modèrna, l’arquitectura.

Òm pòt aparar Occitània a l’escòla, a l’universitat, dins de jornals e de revistas.

Pasmens, l’aparament, la promocion e la socializacion de nòstra lenga passan per una presa de consciéncia encara tròp flaca dels occitans d’origina o d’adopcion.

Cal pas s’acontentar d’un trabalh sul plan cultural  e creire a la bona volontat de l’Estat, de las regions e dels partits politics francimands. Nos cal conquistar per una accion politica nacionalista occitana pro d’influéncia e de poder.

Aquò vòl dire se presentar sistematicament a las eleccions, pertot ont podèm, per  far menar o menar al nivel de las regions, dels departaments, dels pichons païses, de las comunautats de comunas ede las comunas una vertadièra politica lingüistica e tanben emancipar nòstre pòble.

La Val d’Aran nos mòstra lo camin d’una Occitània futura.

Fin finala, nòstra nacion occitana deurà un jorn o l’autre trencar sos ligams de dependéncia de l’Estat francés e venir una republica federala reunificada e respectuosa de sa diversitat interna.

Partit de la Nacion Occitana : 04 66 82 71 94

B.P. 44

30201 Banhòus-de-Cese

www.p-n-o.org

Menut